kab udaasii payaam hotii hai?

kab udaasii payaam hotii hai?

jab muhabbat tamaan hotii hai


kis ke chehre pe subh jaage hai?

jis kii aankhon men shaam hotii hai

ishq bantaa hai kis ghaRii sayyaad?

jab vafaa zer-e-daam hotii hai


Tiis bantii hai aagahii kaise?

Khud se jab ham-kalaam hotii hai


kyaa kamii hai talab kii raahon men?

guftuguu naa-tamaam hotii hai


dil ko bhaatii hai kab sabaa bolo?

jab kisii kaa payaam hotii hai


ye muhabbat hai kyaa bataaoge?

Khaas shai hai jo aam hotii hai


Fakhra Batool

Please leave a comment :)