ku-ba-ku phail ga’ii baat shanasaa’ii ki

kuu-ba-kuu phail ga’ii baat shanaasaa’ii kii

us ne Khushbuu kii tarah merii paziiraa’ii kii


kaise kah duuN ki mujhe chhoR diyaa hai us ne

baat to sach hai magar baat hai rusvaa’ii kii


vo kahiiN bhii gayaa lauTaa to mere paas aayaa

bas yahii baat hai achchhii mere harjaa’ii kii


teraa pahluu mere dil kii tarah aabaad rahe

tujh pe guzre na qayaamat shab-e-tanhaa’ii kii

us ne jaltii hu’ii peshaanii pe jo haath rakhaa

ruuh tak aa ga’ii taasiir masiihaa’ii kii


Parveen Shakir

Please leave a comment :)