mausam-e-abr ho subuu bhii ho

mausam-e-abr ho subuu bhii ho

gul ho gulshan ho aur tuu bhii ho

kab tak aaiine kaa ye husn-e-qubuul

muuNh teraa is taraf kabhuu bhii ho

ho jo teraa saa rang gul kaa hai

dekheN ham tab jab aisii buu bhii ho

hai gar’z ishq sirf hii lekin

shart ye hai ke justujuu bhii ho


sarkashii gul kii sar nahiiN aatii

naaz karne ko vaisaa ruu bhii ho

kis ko bulbul hai dam-kashii kaa dimaagh

ho to gul hii kii guftuguu bhii ho

dil tamanaa-kadaa to hai par “Mir”

ho to us kii hii aarzuu bhii ho

Mir Taqi Mir

Please leave a comment :)