main nazar se pii raha huun ye samaan badal na jaaye

main nazar se pii raha huun ye samaan badal na jaaye

na jhukaao tum nigaahen kahiin raat dhal na jaaye


abhii raat kuch hai baaqii, na uthaa naqaab saaqii

tiraa rind girte girte, kahiin phir sanbhal na jaaye


mirii zindagii ke maalik, mire dil pe haath rakhna

tire aane kii khushii mein miraa dam nikal na jaaye

mire ashk bhii hain is men ye sharaab ubal na jaaye

miraa jaam chhuune vaale tiraa haath jal na jaaye


main banaa to luun nasheman kisii shaakh-e-gulsitaan pe

kahiin saath aashiyaan ke ye chaman bhii jal na jaaye


mujhe phuunkne se pehle, miraa dil nikaal lenaa

ye kisii kii hai amaanat, mire saath jal na jaaye


Anwar Mirzapuri

Please leave a comment :)